У рамках рэспубліканскай акцыі "Бяспечныя канікулы" работнікі Кастрычніцкага раённага аддзела па надзвычайных сітуацыях прынялі ўдзел у агульнашкольных бацькоўскіх сходах.
З мэтай прыцягнення ўвагі бацькоў да пытанняў бяспекі дзяцей працаўнікі МНС сумесна з супрацоўнікамі ДАІ і РУУС Кастрычніцкага раёна выступілі перад законнымі прадстаўнікамі навучэнцаў. У пачатку мерапрыемства ратавальнікі падрабязна асвятлілі галоўныя прычыны дзіцячага траўматызму і спосабы яго прафілактыкі, указалі на што трэба звярнуць увагу для стварэння бяспечных умоў для дзяцей і падлеткаў.
Далей давялі прысутным аператыўнае становішча з пажарамі ў краіне. Больш дэталёва спыніліся на трагічных выпадках, якія забралі жыцці малалетніх дзяцей на пажарах у 2025 годзе, акцэнтаваўшы ўвагу законных прадстаўнікоў на папярэджанне пажараў з прычыны дзіцячага свавольства з агнём і недапушчальнасці пакідання малалетніх дзяцей без нагляду.
Прадстаўнікі МНС таксама нагадалі аб важнасці ўстаноўкі аўтаномнага пажарнага апавяшчальніка, бо наяўнасць такога важнага памочніка ў доме - гэта залог захавання жыцця і здароўя.
